CELEBRACIÓN DO DÍA DO LIBRO

Este ano conmemoramos este día realizando nas aulas fermosos traballos que amosamos nun supermural de Mafalda na entrada do cole, onde atoparedes os lemas e bos consellos para ler durante todo o ano.

SEMANA DA PRENSA ESCOLAR

Consideramos de gran importancia ensinar a función dos distintos medios de comunicación na nosa sociedade. Este ano programamos unha visita escolar ao PROGRESO DE LUGO para comprobar in situ como se elabora un xornal, paso a paso, vendo as instalacións. Unha xornada leda e apaixonante para coñecer o xornal da nosa provincia, e a súa historia.

DÍA DA ÁRBORE E DE REFORESTACIÓN NA ESCOLA

Coa axuda e colaboración da Deputación de Lugo, que nos achegou distintos exemplares sobre a importancia das árbores autóctonas, traballamos a reforestación do noso patio para seguir sementando fábricas de osíxeno, sombra e vida no noso espazo de recreo.

XA CHEGOU O ENTROIDO! IMOLO CELEBRAR TODO O COLE!

Unha data que agardamos todo o ano para desfrutar dos disfraces e da gastronomía típica cunha gran chocolatada. Este ano da man dun orixinal peliqueiro, que fixo de meco. Aceptamos a súas ordes e pasámolo moi ben!

DÍA DA PAZ NA ESCOLA

Tentando inculcar valores de paz e boa convivencia durante todo o ano, tomamos como referente este día para lembrar a través dunha canción colectiva valores de tolerancia e paz.

OBRADOIRO DE EDUCACIÓN MEDIOAMBIENTAL: “CHARLA COS ELECTROCOS”

Neste obradoiro os alumnos aprenderon a reutilizar e reciclar, así como onde depositar os aparellos electrónicos e a función do Punto Limpo dun xeito lúdico e moi didáctico.

UNHA DATA FEITICEIRA: O NADAL

Chegou o Nadal para enchernos desa maxia especial ao carón dun fermoso festival no que amosaron as súas  panxoliñas. Tamén participaron facendo felicitacións co lema: “coidamos o noso monte”, onde xurdiron enxeñosas postais de Nadal coa aportación das familias, que luciron na exposición do noso cole.